सोलापूर जिल्ह्यातील १ हजार २८ ग्रामपंचायतींवर सरपंचपदाचे आरक्षण निश्चित.
गावनिहाय सरपंच पदाचे आरक्षण सोडत १६ डिसेंबर रोजी होणार.
टीम विजयदिप न्यूज.
सोलापूर जिल्ह्यात होऊ घातलेल्या १ हजार २८ ग्रामपंचायतीच्या निवडणुकांचे सरपंच पदाचे तालुकानिहाय आरक्षण निश्चित करण्यात आले असून आता गावनिहाय सरपंच पदाचे आरक्षण सोडत तालुक्याच्या मुख्यालयाच्या ठिकाणी १६ डिसेंबर रोजी तहसिलदार स्तरावरून काढले जाणार आहे.
१६ डिसेंबर रोजी ११ वाजता तालुक्याच्या मुख्यालयाच्या ठिकाणी सोडत घ्यावी व यासाठी यावेळी तालुक्याचे आमदार, पंचायत समितीचे सभापती, जिल्हा परिषद व पंचायत समितीच्या सदस्यांना तसेच सर्व ग्रामपंचायतींचे सरपंच व सदस्यांनाही निमंत्रित करावे, असेही जिल्हाधिकाऱ्यांनी स्पष्ट केले.
सरपंच पदाचे आरक्षण काढत असताना सोडतीसाठी वापरावयाच्या चिठ्ठ्या सारख्याच आकाराच्या असाव्यात व त्यावरती ग्रामपंचायत सरपंच सोडत २०२० असे नमूद करावे अशाही सूचना देण्यात आल्या आहेत.
कोणत्याही प्रवर्गातील आरक्षण निश्चित करताना लगतच्या निवडणुकीतील आरक्षण ध्यानात घेऊन आळीपाळीने आरक्षण द्यावे, असे जिल्हाधिकारी मिलिंद शंभरकर यांनी आदेश दिले आहेत.
तसेच सरपंच पदाचे आरक्षण निश्चित करतेवेळी केंद्र व राज्य शासनाने कोव्हीड-१९ बाबत दिलेल्या मार्गदर्शक सूचनांचे तंतोतंत पालन करावे व कोरोनाच्या अनुषंगाने सर्वोतोपरी खबरदारी घ्यावी, असेही सांगण्यात आले आहे.
सोलापूर जिल्ह्यातील तालुकानिहाय आरक्षण तक्ता.
