माळशिरस तालुक्यातील ४६ ग्रामपंचायतीवर प्रशासक.

४६ ग्रामपंचायतीचा कारभार १० प्रशासकांच्या हाती.

विजयदिप न्यूज.

            माळशिरस तालुक्यातील नोव्हेंबर-२०२० मध्ये मुदत संपणाऱ्या एकूण ४६ ग्रामपंचायतीवर प्रशासक नेमण्यात आल्याचा आदेश जिल्हा परिषदेचे मुख्य कार्यकारी अधिकारी प्रकाश वायचळ यांनी काढला आहे. ग्रामपंचायतीच्या निवडणुका होईपर्यंत या ग्रामपंचायतीचा कारभार प्रशासनाच्या हाती देण्यात आला असुन आता प्रशासकाच्या माध्यमातूनच ग्रामपंचायतीचे कामकाज चालणार आहे. नोव्हेंबर महिन्यात माळशिरस तालुक्यातील ४६ ग्रामपंचायत सदस्यांची मुदत संपणार आहे. 

            कोरोना संसर्गाच्या पार्श्वभुमीवरती निवडणूक प्रक्रिया राबविणे शक्य नसल्याने शासनाच्या आदेशानुसार मुदत संपलेल्या ग्रामपंचायतीवर प्रशासक नेमण्यात आले आहेत. ग्रामपंचायतीवर केंद्रप्रमुख, कृषी अधिकारी, पर्यवेक्षिका, विस्तार अधिकारी, अंगणवाडी पर्यवेक्षिका, मुख्याध्यापकांची नियुक्ती करण्यात आलेली आहे.

      प्रशासक यांना ज्या दिवशी ग्रामपंचायतीची मुदत संपणार आहे त्या दिवसापासून नेमून दिलेल्या ग्रामपंचायतीकडील प्रशासक पदाचा कार्यभार स्वीकारावयाचा आहे. प्रशासकपदी नेमणूक झालेल्या व्यक्तीस मुंबई ग्रामपंचायत अधिनियम १९५८ मधील तरतुदीनुसार सरपंच पदाचा अधिकार व कर्तव्य प्राप्त होणार आहेत.